Памняти Антонія Годинкы - до 150 рочя из дня рожденія академіка (1864-1946)

Русины Мадярщины уже много років честують памнять Антонія Годинкы – знамого ученого, велику особность, котра є приміром вірності науці, честності, гармонії, доброты и скромності. Як ученый, А. Годинка мав дуже шырокый діапазон знань по исторії, теолоґії, філозофії, лінґвістиці, фолклористиці, етноґрафії. Діла нёго не было малых вадь великых тем изглядованя. Ушытка діятелность ученого извязана из ёго привязоностю ид Подкарпатю. Знаковым стала діла нёго Сокырниця, невеликоє село у Хустському районі Подкарпатя, де він жыв, де познав Русинськый Народ, ёго културу, народні співанкы, колядкы и обряди, народ, до котрого обертав ся из словами: «Дорогі мої братчикы!». Своёв великов роботов він лишыв глубокый слїд у исторії Подкарпатськых Русинув, бо быв натілко Русином, на кілко быв Мадяром. А. Годинка лишыв після себе великоє наслїдіє, часть котрого іщі не дуйшла до нас, бо неизглядована. Айбо и тото, што дуйшло, обогатило нас, наш духовный світ. А. Годинка видїв и чувствовав поетику карпатського края, котра звучить у ёго горах, полонинах, лїсах, поточках и старав ся передати їх потомкам. Мы, Русины, можеме гордити ся сим великым чоловіком, ученым «великої ерудиції из шырокым діапазоном», як казав за нёго проф. И. Удварі. У сюй книжці мы снажыли ся представити даякі роботи нашых сочасникув, котрі свідчать про неослабний інтерес до робот и діятелності ученого. Дуже дякуєме онуку А. Годинкы Др. Ласлову Годинці, за предоставлені матеріалы родинного архіва. Окрем того мы снажыли ся познакомити читателюв из роботами проф. И. Удварі, котрый глибоко изглядовав рукописноє наслїдіє А. Годинкы, у котрому усокочений жывий народний русинськый язык из ёго фонетиков, морфолоґіёв, лексиков, фразеолоґіёв, стилістиков. Думає ся, ош будучі учені мають шыроку царину діла далшого изглядованя сёго наслїдія.

ПРОЧИТАТИ КНИГУ